Thursday, October 19, 2006

વિશ્વાસ ( આદ્યંતે* રદીફની ગઝલ )

(ચિત્રાંકન: ડૉ. કલ્પન પટેલ... ... સુરત)

વિશ્વાસ ક્યાં મળે છે કોઈ આંખમાં હવે ?
વિશ્વાસ ચોપડીમાં મળે વાંચવા હવે.

વિશ્વાસ ખટઘડી તણા સંભારણા હવે,
વિશ્વાસ દાદીમાની કોઈ વારતા હવે.

શોધો છો એ જીવન હવે મળશે નહીં કદી,
વિશ્વાસના આ 'વિ' વિનાના શ્વાસમાં હવે.

ફાવી ગયું બધાયને ઘર બહાર ઝાંપે છે...ક
'વિશ્વાસ' નામ કોતરી શણગારતાં હવે.

તારી ને મારી વચ્ચેનું અંતર, કહું ? શું છે?
વિશ્વાસના ન હોવાની સંભાવના હવે.

છો, શ્વાસ જ્યાં નિઃશ્વાસ મૂકે, શબ્દ નીકળે,
વિશ્વાસના વજન વિના શું કામના હવે ?

ડૉ. વિવેક મનહર ટેલર


(આદ્યંતે = બંને છેડે. કાફિયાવાળી પંક્તિમાં બંને છેડે રદીફ - એક છેડે 'વિશ્વાસ' અને બીજા છેડે 'હવે' - રાખીને વિચારની સ્વતંત્રતાને લગીર અવરોધીને ગઝલ લખવાનો એક નાનકડો પ્રયોગ અહીં કરી જોયો છે.)

9 Comments:

At 10/20/2006 04:59:00 AM, Blogger Suresh said...

બહુ જ સરસ પ્રયોગ છે. શ્વાસ અને વિશ્વાસની આ શબ્દ રમત ગમી - પણ તેથી ઘણો વધુ આ ભાવ ગમ્યો.

 
At 10/21/2006 12:30:00 AM, Anonymous કસુંબલ રંગનો વૈભવ said...

તારી ને મારી વચ્ચેનું અંતર, કહું ? શું છે?
વિશ્વાસના ન હોવાની સંભાવના હવે.
oh....good gazal sir....good job also

 
At 10/21/2006 05:54:00 AM, Anonymous ધવલ said...

તારી ને મારી વચ્ચેનું અંતર, કહું ? શું છે?
વિશ્વાસના ન હોવાની સંભાવના હવે.

- ખરી વાત !

 
At 10/21/2006 06:36:00 AM, Blogger Jayshree said...

સુંદર ગઝલ.. !!

 
At 10/21/2006 09:22:00 AM, Blogger VJ said...

Bahu sundar vichar.
sundar gazal ane
mari diary vijaynu chintanvanma muku chhu
www.vijayshah.wordpress.com
abhaar

 
At 10/21/2006 09:48:00 AM, Anonymous Kirit said...

સુંદર!
ડૉ.માનવજીવવિજ્ઞાનમાં હું તો ક્યારેય પણ
હ્ર્દયમાં કે આંખમાં વિશ્ર્વાસના અસ્તિત્વ
વિશે ભણ્યો નથી.
વૃક્ષો અને લગ્નો ટકી રહે છે. એટલે ક્યાંક તો
એ વિશ્વાસ છે જ.
કિરીટ.

 
At 10/23/2006 10:25:00 AM, Anonymous ઊર્મિસાગર said...

"તારી ને મારી વચ્ચેનું અંતર, કહું ? શું છે?
વિશ્વાસના ન હોવાની સંભાવના હવે."

ખૂબ જ સુંદર ભાવ...!!

વિશ્વાસ દેખાય શ્રદ્ધામાં ક્યાંથી હવે?
વિશ્વાસમાં પણ રહી ન શ્રદ્ધા હવે!!

ઊર્મિસાગર

 
At 10/25/2006 12:45:00 AM, Anonymous Anonymous said...

તારી ને મારી વચ્ચેનું અંતર, કહું ? શું છે?
વિશ્વાસના ન હોવાની સંભાવના હવે.

પ્રિય મિત્ર વિવેક,


તારી ગજલને નમે છે સદાય મારુ મૌન.

મીના

 
At 10/28/2006 10:09:00 AM, Anonymous sana said...

Very well said in ghazal.really trust is very important.

It is well said,
"I trust you Is better compliment than I love you."

 

Post a Comment

<< Home