Saturday, April 29, 2006

ચાલો ને મળીએ

(ધુંઆધારના ધોધ, જબલપુર પાસેથી વહી રહ્યાં છે શબ્દ...નવે.'૦૪)


ચાલો ને મળીએ ‘હું’ ને ‘તું’ ની મધ્યના કો’ દેશમાં,
આગત-અનાગત બે પળો દરમ્યાન છૂપા વેશમાં.

અંતર ભલેને જોજનોનું, દૂર છે અંતર શું અમ ?
અંતે થશું ભેળા મહાભૂતોના પંચમ્ દેશમાં.

કોઈ મને પાડે ફરજ ? ના-ના, કદી મુમકિન નથી,
હું જે કરું છું, જેમ છું – મારા જ બસ, આદેશમાં

સમજાયું અંતે તો મને કે તું જ સૌથી શ્રેષ્ઠ છે,
ભૂલી ગયો’તો મૂલ્ય હું કાયમના સંનિવેશમાં.

અલ્લાહની આગળ કયામત પર જઈશું શાનથી,
વાતો નથી મારામાં જે એ ક્યાં છે કો’ દરવેશમાં ?

હોતું નથી એ ઝીલવાનું ભાગ્યમાં હરએકનાં,
બાકી વહે છે શબ્દ સૌમાં, ક્યાં અતિ ક્યાં લેશમાં.

ડૉ.વિવેક મનહર ટેલર

7 Comments:

At 4/29/2006 11:35:00 AM, Anonymous Sana Sheth said...

Doctor u write very well.Photos along with your ghazals itself specify the nature's beauty and Your words are beauty to nature itself.

 
At 4/30/2006 03:31:00 AM, Anonymous SV said...

"ચાલો ને મળીએ" તમને અને વૈશાલીબહેનને ચાલો ને મળીએ !

 
At 5/02/2006 02:59:00 AM, Anonymous Anonymous said...

hey really impressed by ur job!!!!
tamare poems vache ne mane radvu to avi j jaye!!

 
At 5/02/2006 03:00:00 AM, Anonymous siddhi said...

anonymous said ma hu hathi siddhi

 
At 5/05/2006 07:31:00 AM, Blogger Suresh said...

તમારા શબ્દોની જેમ ચિત્રો પણ ઘણા સુંદર હોય છે. તમારો ખજાનો મોટો છે! અમને તેમાં ભાગ આપીને તમે ખરેખર ગમતાંનો ગુલાલ કરો છો.
કવિતાની સાથે આમ તેની પાછળની વાત પણ આપતા રહેશો તો ઘણી મઝા આવશે.

 
At 5/06/2006 06:40:00 AM, Blogger Siddharth said...

અમૃતલાલ વેંગડની નર્મદા પરિક્રમાં વાચ્યા બાદ નર્મદાની વાત આવે તો આનંદ જ થાય છે. જીવનમાં ક્યારેક બેગપેક ભરાવીને "ભોમિયા વિના મારે ભમવા"ની જેમ રખડપટ્ટી કરવાની ઈચ્છા એમનુ પ્રવાસવર્ણન વાંચીને જાગી છે. એમના પુસ્તકમાં ધુંઆધારના ધોધનું સુંદર વર્ણન કરેલ છે. એ વાંચ્યા બાદ આજે તમે એની સુંદર છબિ અને સાથે સુંદર રચના સાથે રજૂ કરી છે તે માટે ખૂબ જ આભાર.

સિદ્ધાર્થ

 
At 2/09/2010 04:21:00 AM, Blogger Meena said...

ચાલો ને મળીએ ‘હું’ ને ‘તું’ ની મધ્યના કો’ દેશમાં,
આગત-અનાગત બે પળો દરમ્યાન છૂપા વેશમાં.

મિત્ર,

સરસ શરૂઆત કરી ને ખાસ તો અંતર વિશે જે વાત માંડી ને શબ્દોનો જે ઉઘાડ લાવ્યો છે એથી વારંવાર મન આ ગઝલ વાંચવા ઇચ્છે છે...

વધુમાં સુંદર છવી મૂકીને - ધુંઆધારના ધોધ, જબલપુર પાસેથી વહી રહ્યાં છે શબ્દ -
આ શબ્દ પણ મને અહીં વારંવાર લાવે છે ... જે સ્થળે મારા બાળપણનાં વર્ષોની સુંવાળપ સ્પર્શી..

સ્નેહ

 

Post a Comment

<< Home