Sunday, March 12, 2006

એટલે આંખોમાં આંસું કોઈ નથી હજી

એ પળો વીત્યાની યાદો ખોઈ નથી હજી,
એટલે આંખોમાં આંસું કોઈ નથી હજી.

ઊરમાં જે આગ ઊઠી, બાળ્યાં છે તેણે નેણ,
તેથી બસ, તેથી આ આંખો રોઈ નથી હજી.

‘હા’ ભલે પાડી ન, પણ ‘ના’ કીધી એ સ્મિતથી
તેથી દિલમાં બેકરારી બોઈ નથી હજી.

રક્ત શું ટપકે ? ટપકશે બસ તારું નામ, લે
પ્રોવી દે દિલમાં છરી, જે પ્રોઈ નથી હજી.

સ્મિતથી ખુલ્લાં દિલે વાતો તું કરે હજી,
આશની સાડીમાં લાગી તોઈ નથી હજી.

ભાવના ! શ્વસે છે વર્ષોથી કેમ આ સમય ?
લાગે છે એણે તને જ જોઈ નથી હજી.


(તોઈ = કસબની કિનારી, ગૂંથેલો છેડો)


ડૉ. વિવેક મનહર ટેલર

3 Comments:

At 3/13/2006 05:40:00 PM, Anonymous Anonymous said...

વાહ .." પળ વીત્યાની યાદો" - ઘણી બારીકાઈથી સમયને પકડ્યો છે.

"આંખોમાં આંસું, ઊરમાં આગ , બાળ્યાં નેણ, રક્ત ટપકે, દિલમાં છરી" - પ્રયોગો એકદમ 'ખૂંખાર' છે.

 
At 8/12/2010 09:06:00 PM, Anonymous Anonymous said...

boss katil hata vicharo tamara ....katl thai gaya amara

 
At 8/12/2010 09:07:00 PM, Anonymous Anonymous said...

boss katil hata vicharo tamara ...
katal thai gaya amara...

 

Post a Comment

<< Home